Þessi ferð er einstaklega skemmtileg fyrir þá sem vilja fræðast og fá góða hreyfingu í leiðinni. Farið er yfir söguna um gosið, sagt frá fólkinu sem upplifði eldgosið og þurfti að yfirgefa heimili sín skyndilega. Einnig er farið létt yfir frekari sögu eyjanna og því er mikill fróðleikur um sögu og lífið á eyjunni í dag og á fyrri tímum. Innfæddur leiðsögumaður gerir gönguna skemmtilega með því að flétta saman skemmtilegum sögum frá fólkinu í bland við staðreyndir. Mikilfenglegt útsýnið á toppi Eldfells eru svo bestu verðlaunin eftir að hafa gengið upp fjallið.
Gangan byrjar á bryggjunni og er gengið í átt að Skansinum. Við stoppum á Skansinum og förum yfir það fallega svæði. Förum léttilega yfir þau mannvirki sem eru staðsett þar eins og stafkirkjuna, Landlyst, virkið o.fl.
Frá Skansinum er gengið út á nýja-hraunið og stoppum þar sem gamla sundlaugin stóð, þaðan förum við og göngum meðfram hraunjaðrinum, þar blasir Vestmanneyjabær við. Farið er yfir sögu hraunhitans og komið við á útsýnsipallinum þar sem farið er yfir það þrekvirki sem eyjamenn stóðu frammi fyrir á sínum tíma, að snúa til aftur heim eftir gos. Þannig að hraunið er létt og skemmtileg ganga með nokkrum sögustoppum. Næst tekur við eldfjallið sjálft sem er aðeins meira krefjandi en hraunið, þá fara allir bara á sínum hraða og er fjallið eins og fimm brekkur sem auðvelt er að stoppa á milli. Toppurinn á Eldfellinu geymir eitt fallegasta útsýni eyjanna. Eftir að komið er niður fjallið leiðbeinir leiðsögumaður hvar best er að ganga ef þú vilt enda í miðbænum, í Eldheimum eða gera annað skemmtilegt.
