Í Vestmannaeyjum býr afburðahresst fólk sem kann að skemmta sér. Seinustu ár hefur eyjastemningin verið flutt í Hörpu þar sem þúsundir hafa fengið að kynnast góðu partýi og eyjalögunum vinsælu. Á Þjóðhátíð koma tugþúsundir saman í stærsta eyjapartýi ársins þar sem gítaspil og lögin okkar góðu hljóma nánast allan sólarhringinn þar sem hvítu tjöldin standa og allir taka svo undir í brekkusöng. Þetta kunnum við – Eyjapartý er gott partý!
Nú er tækifæri til að skoða Vestmannaeyjar í þessari flottu djammferð og gera eins og á Þjóðhátíð – byrja snemma og taka daginn með trompi. Við bjóðum upp á að sækja hópa hvert á land sem er eða byrja ferðina þegar komið er til eyja. Það er ekkert mál að vera búin að sækja og kæla drykki sé þess óskað.
Við tökum hress á móti hópnum í eyjum og byrjum ferðina á veitingastaðnum Tanganum, þar sem ríkulegur salatbar og þrjár tegundir af súpum eru í boði. Tanginn er heillandi veitingastaður þar sem góður matur og geggjaðir drykkir skemmta bragðlaukunum og Heimaklettur horfir inn um gluggana.
Næst er skemmtiferð um eyjuna þar sem við keyrum á milli staða, förum út, skoðum okkur um og heyrum fyndnar sögur af eyjamönnum og gestum okkar. Hægt er að reyna sig í sprangi sem er þjóðaríþrótt eyjamanna og vekur það ætíð kátínu í hópnum að sjá fólk gera sitt besta eftir að vanur sprangari hefur sýnt réttu handtökin. Við lofum leiðsögumanni sem er góður í gríni og glensi og jafnvel gæti verið smá kjaftur á honum, það kemur í ljós. Í ferðinni má finna flotta staði fyrir hópmyndatöku og drykkir eru staðalbúnaður.
Eldheimar taka við eftir skemmtiferðina. Við eigum fullt af góðum sögum úr gosinu svo að skoða safnið og gera sér grein fyrir áhrifum gossins eftir að hafa heyrt grátbroslegu sögurnar er sérstök upplifun. Hver og einn skoðar safnið á sínum hraða með sínum eigin leiðsögubúnaði.
Veistu hvað kró er? Næsta stopp er nefnilega ein af krónum sem finna má nálægt sjónum. Krær eru gamlar veiðarfærageymslur og beituskúrar sem hafa verið dekkaðar upp fyrir lopapeysupartý. Jafnvel má finna fiskikar fyllt með ís til að kæla drykki fyrir utan, svona ef þess er óskað. Hér tekur við tónlist og stuð og smá eyjastemning. Trúbador mætir á svæðið og tekur örugglega lög sem allir þekkja. Ef það er eitthvað sem segir eyjapartý þá er það pottþétt gítarspil og söngur.
Kokkur frá veitingastaðnum Einsa kalda mætir, hitar grillið og græjar meðlætið. Maturinn hjá Einsa kalda er auðvitað bara eitthvað annað þegar kemur að bragðgæðum og þjónustu. Geggjuð grillveisla er tilbúin fyrir hópinn þegar trúbadorinn klárar og góður grillmatur toppar ferðina áður en haldið er af stað í Herjólf.
Verðið á ferðinni miðast við 25 einstaklinga hóp.